રવિવાર, 14 મે, 2023

034, સાચો રાહબર સાધુ

 


સાચો રાહબર સાધુ

ઢાળ:- સાધુ વો નર હમકો ભાવે...જેવો

૧૬.૧૧.૨૨

સાધુ વિશ્વ ને રાહ બતાવે, 

માયા જગતની મન થી મિટાવી, ભક્તિને માર્ગ ચડાવે...


માયા પતિ ની મોહ માયા ભલે, ભલા ભલા ને ભુલાવે

સંત સમાગમ તૃણ ગંજીમાં, સત્ય ની સોય બતાવે...


જીવડો ભટકે ભવ સાગરમાં, બાહ્ય પકડી ને બચાવે

મરજીવા બની મર્મ ના મોતી, ગર્તથી ગોતી સમજાવે...


ભોળા ભક્તો જ્યારે ચડે ચકડોળે, સત્ય સમજ નહીં આવે

માર્ગ ભૂલ્યા ને પથદર્શી બની, મંજિલ દ્વાર બતાવે... 


દીન "કેદાર" પ્રભુ દાસ તમારો, એકજ આશ ધરાવે

રોમે રોમ અવગુણ ભર્યા છે, બાળ ગણી ને બચાવે....


ભાવાર્થ;- સંતો-મહંતો કહે છે કે સાચો સાધુ હોય તે એક સાચો માર્ગદર્શક કે ગુરુ બની શકે છે અને આ જગત ની માયા માંથી જીવ ને છોડાવીને સાચા રસ્તે ચડાવી શકે છે.  

    આ જગત ની માયા ના માલિક ભગવાન પોતે છે, એની જાળ માં થી કોઈ છૂટી શકતું નથી, સામાન્ય માનવી તો ફસાય છે, પણ મોટા મોટા પંડિતો પણ છટકી શકતા નથી. પણ જો સાચો સંત-સાધુ મળી જાય તો ઈશ્વરની આ માયા માંથી પણ જીવ ને બચાવી શકે છે.

    આ ભવ સાગર ના ભ્રમર માં જ્યારે જીવ ચકરાવે ચડે છે ત્યારે સાચો સાધુ મરજીવો બનીને આવે છે અને ભ્રમણા માંથી સાચા મર્મ રુપી મોતીડા બતાવી ને બચાવે છે. 

  જ્યારે કોઈ ભોળા ભક્તો આ સંસાર ની આંટી ઘૂંટી માં ફસાય ત્યારે જો સાચો સાધુ મળી જાય તો એક સાચા માર્ગદર્શક બની ને છેક મુક્તિ ના દ્વાર સુધી પહોંચાડી શકે છે.

    હે ઈશ્વર, હું તો પામર જીવ છું. હું તારી માયામાં એવો ફસાયેલો છું કે મારા રોમે રોમ માં અવગુણ ભરેલા છે. મને તો કોઈ સાચો સાધુ-સંત મળે એવા પણ મારા ભાગ્ય નથી, પણ એકજ આશા છે કે તું મને તારો બાળ ગણીને આ ઘોર પાપ કર્યા છે, એમાં થી ચબાવી લેશે.


093, હું શાયર નથી


             


                           હું શાયર નથી 


૯.૨.૨૩

નથી શાયર નથી લહિયો, શબ્દ બસ એમ રાખુ છું

પ્રભુની પ્રાર્થના કાજે, કવિનો વહેમ રાખુ છું...

 

નારાયણ કંઠ થી વહેતાં, બન્યું ગંગા ગંદું પાણી.

પહોંચ્યું સ્પર્શવા પારસ, ગજબ ગુમાન રાખુ છું..


ગવાયા ગીતડાં મારા, ભજન નો ભેખ પહેરીને.

ચડ્યા શબ્દો મુખે સંતના, ગુલાબી ગર્વ રાખુ છું..


રહેછે દૂર સૌ મારા, પરાયા પ્રીત રાખે છે.

છતાંએ પ્રેમ થી એની, ખરી પરવાહ રાખુ છું..

 

થશે વિદાઈ આ જગ થી, કહી "કેદાર" ને ત્યારે. 

હતો કવિરાજ બહુ મોટો, અપેક્ષા એજ ભાખું છું...  


ભાવાર્થ:-હું કોઈ કવિ-શાયર કે લેખક નથી, છતાં ભગવાન ની પ્રાર્થના કરું છું એમ માનીને કવિ હોવાનો વહેમ રાખુ છું.

    મારી રચનાઓ બ્રહ્મ લીન નારાયણ બાપુ ના કંઠ સુધી પહોંચીને સામાન્ય ગીત માં થી ભજન ગંગા જેવી પવિત્ર બની. બધી લોઢાની વસ્તુ પારસ સુધી પહોંચી નથી શકતી. પણ અહીંતો નારાયણ બાપુ મારી રચના સુધી પહોંચ્યા એનો મને ગર્વ છે.

     મારા બનાવેલા ગીતો ભજન નું રૂપ ધારણ કરીને અનેક સંતો-મહંતોના ચરણો સુધી પહોંચ્યા, અનેક ભજન ગાયકો ના કંઠે થી પ્રસારિત થઈને ભાવિક ભક્તો સુધી પહોંચ્યા એ નાની વાત નથી.

   હા એક અફસોસ જરૂર છે, અને એ સર્વ સામાન્ય હોય છે, તુલસીદાસજી પણ આમાં બાકાત ન હતા. જે સદા મારી સાથે રહે છે, ભજન ગાયક છે, સારું ગાય છે, ઘણાં શ્રોતાઓ પણ છે, છતાં મારી રચનાઓ ગાવાની તકલીફ નથી લેતા, જે હોય તે, પણ હું ઇચ્છું કે તેઓ સદા પ્રભુ ભજન કરતા રહે.

   પણ છતાં એક વાતનો મને ભરોસો છે કે જ્યારે આ જગતમાં થી મારી વિદાય થશે ત્યારે તેઓ મારા ખૂબ વખાણ કરશે, મારી રચના ભલે ગાશે નહીં પણ સરાહના ખૂબ કરશે એવો મને સો ટકા વિશ્વાસ છે.  

જય નારાયણ.


રવિવાર, 31 જુલાઈ, 2022

10, શિવનો જાપ-કીર્તન


                                                           શિવનો જાપ-કીર્તન

૩૧.૭.૨૨

જપતાં શિવ શંકર નો જાપ હૃદય માં, ભક્તિ જાગે છે

ભક્તિ જાગે છે અમો ને પ્યારો લાગે છે...


માયા પ્રભુ ની મન લલચાવે, ભ્રમ માં મન ભટકાતું

રાત દિવસ જીવ ચડે ચકરાવે, સત્ય નથી સમજાતું

શિવ નામ ઠરાવે ઠામ,  અમો ને પ્યારો લાગે છે...


ભભૂત લગાવી ત્રિપુંડ તાણી,    ડમરુ નાદ ગજાવે

કંઠ માં જગ ના ઝેર ધર્યા છે,  ભુજંગ અંગ સજાવે

જટામાં ગંગાજી શણગાર,  અમો ને પ્યારો લાગે છે...


જ્યોતિર્લિંગ નો મહિમા મોટો, વેદ પુરાણ વંચાતો

નારદ શારદ નમનું કરે છે,  ભક્ત શિવ રંગમાં રંગાતો

સ્વયંભૂ તેજ પુંજ પ્રકાશ, અમો ને પ્યારો લાગે છે...


"કેદાર" ભોળા બાળ તમારો,   એકજ અરજી મારી

ગણેશ કાર્તિક માત શિવા સંગ, મનમાં મૂર્તિ તમારી    

અહર્નિશ કરજો મનમાં વાસ, અમો ને પ્યારો લાગે છે...


ભાવાર્થ:-હે ભોળા નાથ, મને તારો જાપ કરવામાં આનંદ આવે છે, કારણ કે મને તારું નામ બહુ પ્યારું લાગે છે.

     ભગવાન વિષ્ણુની માયા આખા જગતના જીવ ને ભ્રમિત કરે છે, ભક્તિ માર્ગ થી ભટકાવે છે અને મન જ્યાં ત્યાં ભમે છે, પણ તારું નામ મન ને ઠરવા નું સાચું ઠેકાણું બતાવે છે.

  આપે ભભૂતી લગાવી છે, ડમરુ નો નાદ કરો છો, કંઠમાં હળાહળ ઝેર ભર્યું છે, વળી અંગ પર સર્પો નો શણગાર કર્યો છે, આપની જટામાં પવિત્ર ગંગાજી બિરાજમાન છે, આ આપનું રૂપ નિરંતર મારા મનને આનંદ આપે છે.

    હે ભોલે નાથ, આપે જ્યોતિર્લિંગ માં સ્વયં આપનું તેજ મૂક્યું છે, જેની વેદો અને પુરાણોમાં આરાધના થાય છે, સંતો મહંતો સપ્તર્ષિ પણ એની પૂજા કરે છે, એવા આ તેજ પુંજ થી મારું મન ભક્તિ મય બની જાય છે.

    હે ભોળા નાથ હું તો આપનો બાળક છું, મારી બસ એકજ અરજ છે કે માતા પાર્વતીજી, પ્રથમ પૂજ્ય ગણેશજી અને કાર્તિક સ્વામી સાથે સદા મારા મન મંદિરમાં બિરાજમાન રહો.


સોમવાર, 27 જૂન, 2022

070, તારી માયા

                                   



                                                      તારી માયા

૩૦.૧૦.૨૧

ઢાળ-બ્રહ્મ લીન નારાયણ બાપુએ ગાયેલ ભજન-"જીવન ના સુર ચાલે"..જેવો


આ માયા બધી છે તારી, પરખી શકું ના તુજને

અઘરું જગત છે તારું,  સમજણ પડે ના મુજને..ટેક..


સુંદર બતાવી સપના,  છીનવો નહીં છોગાળા

હું તો માનવ મગતરું નાનું, મસળો ના માવા મુજને...

 

મૃગજળ બતાવી માધવ,  મને દોડાવો ના દયાળુ

હું તો તરસ્યો હરિ ના રસ નો, પિવડાવો નાથ મુજને...

  

તણખલે તરી જવાની, આશા છે મારા ઉરમાં

પકડીને બાહ્ય મારી,      તારીદો તાત મુજને...

 

કેવો છે ન્યાય તારો,   રાંકાને કાં રંજાડો

નિર્લજ્જ અને નઠારાં, નજરે પડે ના તુજને...


આ "કેદાર" પામર તારો, વેંઢારે શેં ભાર જગ નો

આપીને બોજ આવા,   શીદ ને સતાવે મુજને...


ભાવાર્થ:- હે નાથ, આપની આ માયા માં મને કશી સમજ પડતી નથી, તારું બનાવેલું આ જગત એવું ગૂઢ છે કે મારી મતી એમાં કંઈ કામ કરતી નથી. 

     હે નાથ, તું મને એવા એવા સ્વપ્નો દેખાડે છે કે હું મારી જાત ને ખૂબ સુખી માનુ છું, પણ પછી આ બધા સુખો તમે એકજ ઝાટકે છીનવી લો છો. હે નાથ હું તો તારી માયામાં ભટકતું એક નાનું એવું મગતરું છું, આપ આમ મને દુખી કરીને શા માટે મસળી નાખો છો?

    હે પ્રભુ, આપ મને ઝાંઝવા ના જળ બતાવીને દોડાવ્યા કરો છો, પણ મને તો આપના ભજન ની પ્યાસ છે, મને આમ ભટકાવી ન દો નાથ.

   મને આ ભવ સાગર તરવા માટે એક તારા નામ નો સહારો છે અને માનુ છું કે કોઈ પણ પ્રકારે કરેલું તારું ગાન મને તારી દેશે, માટે આપ મને સહારો આપો અને આપના શરણમાં સ્થાન આપશો અવી આશા રાખુ છું.

   હે નાથ, ક્યારેક એવું લાગે છે કે તારો ન્યાય કેવો છે? કોઈ સીધા સાદા માનવીને તું એવા દર્દો આપે છે કે તે સહી શકતો નથી, જ્યારે કોઈ પાપી દુરાચારી, જે તને યાદ પણ ન કરતો હોય એવા ને સુખમાં રાચતા જોતાં એવું લાગે છે કે શું તને આવા અધર્મીઓ દેખાતા નહીં હોય? 

   હે ઈશ્વર આ તારો કેદાર તો એક પામર જીવ છે, એના પર તું જે ભાર નાખી રહ્યો છે, તે હું કેમ કરીને સહન કરી શકીશ? માટે દયા કરો અને મને આપના ભજન કરવાની શક્તિ આપો. 

રચયિતા-
કેદારસિંહજી મે. જાડેજા
ગાંધીધામ
૯૪૨૬૧૪૦૩૬૫
kedarsinhjim.blogspot.com.

043, ભક્ત ઉધારણ ભગવાન.


    


                                 ભક્ત ઉધારણ ભગવાન.

૨૯.૫.૨૨

પ્રભુજી તારા ભક્તો હરિ રસ માણે,

સંત જનો જે ભાવ થી ભજે તેને, ક’દિએ ન અળગો જાણે.....


શબરી કદી ના મંદિર જાતી, કથા કીર્તન નહીં જાણે

ઝોંપડીએ જઈ એઠાં ફળો નો, અનહદ આનંદ માણે......


ભક્ત સુદામા મિત્ર તમારો, સંકટ સહેતો પરાણે

કંચન મહેલો એના કીધા, ચાર તાંદુલ ના દાણે....


ભક્ત વિદુરની ભાજી ભાવે, મેવા ન ભાવે પરાણે

મીરાં બાઈ ને મુખમાં સમાવી, મુક્તિ અપાવી ટાણે.......


જલારામ ને જાણી શક્યા નહીં, માંગ કીધી તેં કટાણે

યાદી આપી પ્રભુજી પધાર્યા, પીઠ દેખાડી પરાણે....


"કેદાર" કનૈયા દાસ તમારો, કર્મ ધર્મ નહીં જાણે

મહેર કરો મનમાં મોહન નાચે, અવર ન ઉર માં આણે....


રચયિતા-

કેદારસિંહજી મે. જાડેજા

ગાંધીધામ

૯૪૨૬૧૪૦૩૬૫

kedarsinhjim.blogspot.com.



મંગળવાર, 11 જાન્યુઆરી, 2022

036, ગોવિંદની ગૂઢ ગતિ


                                                 ગોવિંદની ગૂઢ ગતિ

ઢાળ- અબ સોંપ દીયા ઈસ જીવન કા...જેવો

ગોવિંદ તમારી ગૂઢ ગતિ,     પહોંચે નહીં મારી મૂંઢ મતી..

શ્રી રામ તણો અવતાર ધરી,     એક નારી કેરી પ્રતિજ્ઞા કરી
પણ કૃષ્ણ જન્મમાં ગજબ કરી, પરણ્યા અગણિતને કેમ કરી..   

હણતાં પહેલાં દુષ્ટ રાવણને, આપ્યો અવસર પ્રભુ ફરી રે ફરી
માર્યો વાલીને કપટ કરી,    સમજ ન આવે તારી રીત જરી...

વ્રજનારના મનમાં ધીરજ ભરી, આવું ગોકુળ એક વાર ફરી
મથુરા જઈ વળતી ન નજરૂં કરી, ભૂધર ભરોંસો રહે કેમ કરી... 

શિશુપાલની સો સો ગાળો સહી, કાળયવન મરાવ્યો કપટ કરી
"કેદાર" ની અરજી એક જરી, અપો સમજણ સૌ ભ્રમને હરી

બુધવાર, 8 ડિસેમ્બર, 2021

દીન દયાળ દયા સાગર


                                              દીન દયાળ દયા સાગર

ઢાળ- બ્રહ્મ લીન નારાયણ બાપુએ ગાયેલ ભજન-"અબ સોંપ દીયા ઈસ જીવન કા".જેવો.


દીન દયાળ દયા સાગર, વરસાવો અમ પર વહાલ ઘણું

અમે ફૂલ તમારા બાગ તણા, બની માળી માધવ કરો જતન ઘણું....


આપી ભૂમિ બહુ બદબૂ ભરી, અંકુર ત્યાં આવે કેમ કરી

ફણગો ફૂટવા નહીં યોગ્ય જરી, વરસાવ્યું વહાલ ત્યાં આપ તણું...  


નયનો ના નેહ થી નીક ભરો, નીત પ્રેમ તણું પ્રભુ ખાધ પૂરો

આશિષ ઔષધ છંટકાવ કરો, ભક્તિ રસ પ્રસરે અણુ એ અણુ....


જે બાળ તને બહુ યાદ કરે, કોઈ દુખની ના ફરિયાદ કરે

હરદમ હરી રસનું પાન કરે, વરસાવો વિઠ્ઠલ ત્યાં વહાલ ઘણું....


પ્રભુ એક અરજ સરકાર કરૂં, ગદ ગદ થઈ ગોવિંદ ગાન કરૂં

હર રંગમાં રાઘવ ધ્યાન ધરું, શ્વાસો માં સમરણ આપ તણું...


 "કેદાર" ને ક્યારી એવી મળી, ભવ સાગર તરવા નાવ મળી

સુકાન રહે સદા તવ કર માં,   લક્ષ્ય રહે તવ શરણ તણું... 


ભાવાર્થ-

   હે ઈશ્વર આ જગત આપની ફૂલવાડી છે અને આપના બગીચાના સુગંધી ફૂલો આ જગતને ફોરમ ફેલાવવા માટ આપે અમારું નિર્માણ કર્યું હોય એવું લાગે છે. પણ હે નાથ આપે આ કાર્ય માટે માળી બની ને દેખરેખ રાખવી પડશે.

   હે નાથ, આ શિવ તત્વથી અલગ કરેલા જીવ ને જન્મ આપવા માટે તેં માતા ના ગર્ભ માં જે સ્થાન આપ્યું છે તે અનેક જાતની ગંદકી થી ભરેલું છે, ત્યાં તેનો વિકાશ કેમ થાય ? તેમાં કુંપળ કેમ આવે ? પણ આપે દયા કરી છે, આપના વહાલ રૂપી વરસાદ કરીને તેને આપ અંકુરિત કરો છે.  

   આપે શિવ તત્વને જીવ બનાવી માતાના ગર્ભમાં સ્થાપિત તો કર્યો, પણ હવે તેને ફરી શિવ શરણમાં પહોંચાડવા માટે આપની અમી દ્રષ્ટી-પ્રેમ અને આપનીજ માયા રૂપી જાળમાંથી છૂટવા માટે યોગ્ય ઔષધ નો છંટકાવ કરવો પડશે, જ્યારે એ જીવ ના રોમે રોમ માં ભક્તિ નો સંચાર થશે તોજ જીવ શિવ તરફ ગતિ કરી કસશે. 

   આપ આખા જગતના સર્જન હાર-પાલનહાર અને સંહારક પણ આપજ છો, છતાં જીવ જે કર્મો કરે છે તેને પાપ કે પુણ્ય લેખાવીને તેને દોષ આપો છે, આ આપની રમત રમવાની એક બાઝી હોય એવું લાગે છે, અને અમે જાણે પ્યાદાં હોઈએ, પણ નાથ, જે આપનું સ્મરણ-ભજન- ગાન કે સ્તવન કરે એને આપે આપની માયા ના જંજાળ માંથી રાહત આપવી જોઈએં.

     હે નાથ, મારી બસ એકજ અરજી છે કે આ તારી માયા ખૂબ ગૂઢ છે, મને શક્તિ આપજે કે હું એમાં ફસાયા વિના સદા આપનું ધ્યાન ધરતો રહું અને શ્વાસે શ્વાસે તારું સમરણ કરતો રહું.  

      હે નાથ આપનો ઉપકાર છે કે આપે મારા જીવ નું રોપણ એવી ક્યારીમાં કર્યું (ભક્તિ સભર મારી માતા નું ઉદર) કે ત્યાંથીજ મને આ ભવ સાગર પાર કરીને તારા અનંત તેજમાં ભળી જવાનો માર્ગ મળ્યો છે, બસ મારા જીવનમાં ક્યારેય હું ભક્તિ માર્ગ થી ભટકું નહીં, મારું લક્ષ્ય સદા આપનું શરણ રહે એજ અભ્યર્થના. 


ફોટો-ગુગલ ના સહયોગ થી