સખુબાઈ

સખુબાઈ

                                                                                      

ઢાળ:- હું તો કાગળિયા લખી લખી થાકી- ગવાય છે એવો.

ખાસ નોંધ:-સખુબાઈ વિષે બે ત્રણ પ્રકારની વાતો સાંભળવા મળે છે, પણ જે વધારે સમર્થન પામે છે તેના પર થી મેં આ ભજન બનાવ્યું છે, છતાં જો કોઈ ભૂલ હોય તો તે મારી જ હશે, અને આપને પણ કોઈ ભૂલ જણાય તો સૂચન કરવા વિનંતી.                    

  

વહાલો ઘૂંઘટમાં લાગે વહાલો વહાલો, બન્યો છે સખુ સામળિયો.. 

વહાલો ભક્તોના ભાર હરનારો, બન્યો છે સખુ સામળિયો..

સખુ સિધાવી જ્યારે સાધુઓની સાથે, ભક્ત કેરો ભાર લીધો ભૂધરા એ માથે

                                         આવ્યો સખુનું રૂપ લઈ રસાળો...બન્યો...

ઊઠી  અંધારે નિત દરણા દળાવે,  શિર પર ચડાવી હેલ પાણીડા ભરાવે

                                     રૂડિ ચાલે છે ચાલ ચટકાળો...બન્યો..

બની ગોવાલણ દૂધ દોવડાવે,   મારી કછોટો માવો મહીડા વલોવે

                                   ગાય ગીતો ગીતાનો ગાનારો...બન્યો..

ઈંધણા વીણીને રૂડિ રસોયું બનાવે, સાસુ સસરાને વહાલો પ્રેમે પિરસાવે

                                     માંજે વાસણ છે મોરલી વાળો...બન્યો..

સાસુ નણંદના પાવલાં દબાવે, શેષ ઉપર સુતો જે ગોદડી બિછાવે

                              વહાલો ભક્તોની ભીડ ભાંગનારો...બન્યો...

સાસુ નણંદ સૌ મનમાં વિચારે, શાણી થઈ સખુ હવે સોટીના મારે

                                    મુખ મલકાવે નંદનો દુલારો...બન્યો...     

સખુ સિધાવી સ્વર્ગ સંત સંભળાવે, જીવન મરણ હરિ હાથ સત્ય સમજાવે

                                       જે જનમ્યો તે એક દિ’ જવાનો..બન્યો..

શાનો છે સંઘને શાની કરો વાતો, સખુ તો રહેતી સંગ દિવસને રાતો

                                         કર્યો સંતો એ ઈશનો ઇશારો...બન્યો...

સાસુ સસરા સૌ પડ્યા હરિ પાયમાં, પ્રભુ દુભાવ્યા હવે મુક્તિ કેમે થાય ના

                                              ફટ ફટ અવતાર અમારો...બન્યો...

ભક્તો કેરી ભક્તિ ભાળી ભૂધરાએ ત્યારે, કીધી સજીવન સખુબાઈને પ્યારે

                                           એણે કીધો જનમ ઊજિયારો...બન્યો...

દિન "કેદાર"ના દામોદર રીઝતાં, સાસુ સસરા નણંદ પર નહીં ખીજતાં

                                         એણે કીધો અધમનો ઉદ્ધારો...બન્યો...

રચયિતા:-            

કેદારસિંહજી મે. જાડેજા

Kavi Kedar's"દીન વાણી" ગ્રૂપ, 

ગાંધીધામ, 

૯૪૨૬૧૪૦૩૬૫. 

Email-kedarsinhjim@gmail.com      

ફોટો ગુગલાના સહયોગ થી.