કાલ કોણે દીઠી છે ?
કરીલે આજ ની વાત,
જોજે ન કાલની વાટ
કાલ કોણે દીઠી છે...
લખ ચોરાશી પાર ઊતરવા,
અવસર આવ્યો આજ
કૃપા કરી કરૂણાકરે આપી,
મોંઘી માનવ જાત...
જીવડો જાણે હું મોજું કરી લવ,
પછી ભજન ની વાત
અધવચ્ચે આવી અટવાતો,
ખાતો યમ ની લાત...
પિતા પ્રભુના એ કાલ પર રાખી,
રામના રાજ્ય ની વાત
ચૌદ વરસ માં કૈંક કપાણા,
કૈકે ખાધી મહાત...
કાલ ન કરતાં આજ ભજીલે,
બાજી છે તારે હાથ
ખબર નથી ક્યારે ખોળિયું પડશે,
કોણ દિવસ કઈ રાત..
આ સંસાર અસાર છે જીવડા,
સાચો જગનો તાત
ભવ સાગર નું ભાતું ભરી લે,
ભજીલે તજી ઉત્પાત...
દીન" કેદાર "નો દીન દયાળુ,
કરે કૃપા જો કિરતાર
એક પલક માં પાર ઉતારે,
વસમી ન લાગે વાટ..
No comments:
Post a Comment